Abaabayan 100 Tadau Wikipedia Toun 2025 nopo nga iso pinggisaman di pinaanjur do Kalab Wiki Kent id siriba do Jabatan Boros Kadazandusun, Institut Pendidikan Guru Malaysia (IPGM) Kampus Kent. Ontok 05 Mikat 2025, nakalantoi o Kalab Wiki Kent do popoindalan o Kopoimaganan Abaabayan 100 Tadau Wikipedia Toun 2025 di nokoindalan id Diwan Kuliah 2, IPGM Kampus Kent Tuaran. Id abaabayan diti kiharo o kaampayatan mantad di Gundohing Haji Harun bin Haji Sarail, Zandi Lorendah Joseph, pegawai meja Boros Kadazandusun, Jabatan Pendidikan Negeri Sabah, lungkitas JBKD Gundohing Victor Baga, Dr Wilfred Bin Dousip, Dr Rosie Johnny om mokiikinobos PISMP Koonuan Manom 2021 – Madas 2026 om PPISMP BKD Koonuan Magus 2024 – Madas 2029.
Abaabayan diti nopo nga kitudu montok popoingkawas kopomogunoon boros Kadazandusun id platform digital, loolobi po id suang Wikipedia. Sonlinaid 100 tadau kopoindalanan abaabayan diti, soginumu 54 mokiikinobos boros Kadazandusun ka’ampai do papa’asil soginumu 378 atikol wagu id suang Wikipedia Boros Kadazandusun. Maya abaabayan diti kaanu popokito do goos di tosonong montok popoinggumu o suang digital id boros tina miampai popoiggumu ponuatan om pongilangan toilaan maya kopomogunoon Wikipedia.
Solinaid kopoindalanan abaabayan diti, nokointutun o mokiikinobos kumaa kaida mongidit om ponuatan atikol maya platform Wikipedia di pinolombus mantad apat fasilitator di abaal. Tolu fasilitator dii nopo nga mongingia boros Kadazandusun, ii Tati Jilorisa John, Tati Michelina Michael, Tati Correl Moris om songulun mobi mantad Wikimedia Community User Group Malaysia ii Farouk Azim. Ponontudukan diolo soginumu tolu sesi diti kaanu kopio manahak bagas di agayo kumaa mokiikinobos montok popoingkawas kopoilaan om korotian diolo kokomoi kaida mongidit om pomuatan atikol Wikipedia id boros Kadazandusun (dtp).
Alansan do abaabayan diti kaanu poposibarak po sunduan tulun ginumuan mooi do loobi ogumu pinggisaman miagal diti id timpu tobontol. Maya pisosokodungan mantad toinsanan miagal ko Wikimedia Community User Group Malaysia, Kalab Wiki Kent om Jabatan Boros Kadazandusun IPGM Kampus Kent, goos montok popoingkawas boros Kadazandusun id suang maya kaanu kotilombus om loobi koburu id timpu tobontol.Alansan nogi daa do lobi ogumu pisompuruan miagal diti poindalanon id timpu dumontol montok popoinggumu po kawagu atikol suang boros Kadazandusun id Wikipedia.
Can you help us translate this article?
In order for this article to reach as many people as possible we would like your help. Can you translate this article to get the message out?
Start translation