ვიკიპედია ქართულ ენაზე 20 წლის წინ, 2003 წლის ბოლოს გაეშვა. თუმცა, პირველი სტატია ქართულ ვიკიპედიაში 2004 წლის 25 თებერვალს შეიქმნა და იყო ედუარდ შევარდნაძეზე. აქედან იწყება ის გზა, რომელიც განვლო ქართულმა ვიკიპედიამ და მოვიდა დღემდე.
2005 წლის ბოლოსთვის ქართული ვიკიპედია უკვე 4 000 სტატიით ხვდება. ვიკიპედიამ ნელ-ნელა დაიწყო განვითარება და ადგილის დამკვიდრება სხვაენოვან ვიკიპედიებს შორის. ვიკიპედიამ 10 ათას სტატიას კი უკვე 2006 წლის 11 აგვისტოს მიაღწია.
თავდაპირველად ვიკიპედიაში სტატიების შემოტანა წყაროს გარეშე საკმაოდ ქაოსურად ხდებოდა და ძველი რედაქტორებიც რეალურად ორიენტირებულები იყვნენ რაოდენობაზე და არა ხარისხზე. მაგრამ მას შემდეგ, რაც წყარო სავალდებულოდ გახდა, დაიწყო ყველა სტატიისათვის წყაროს მითითება და პარალელურად კვლავ მიდიოდა მუშაობა სტატიების რაოდენობაზეც.
2015 წლის 13 ოქტომბერს ქართულ ვიკიპედიაში სტატიების რაოდენობამ 100 000-ს გადააჭარბა. ამჟამად კი სტატიების რაოდენობამ 170 000-ზე მეტია და ამ მაჩვენებლით იგი მსოფლიოში არსებული 326 სხვადასხვაენოვან ვიკიპედიას შორის 58-ე ადგილზეა. ქართული ვიკიპედიის რედაქტორები ამჟამად ორიენტირებულები არიან სტატიების ხარისხზე და ამ მიზნით ტარდება უამრავი შიდა თუ საერთაშორისო კონკურსი. კონკურსების ჩატარების დროს დაწესდა ისეთი კრიტერიუმები, რაც ხელს უწყობს სრულყოფილი სტატიების შემოტანას ან უკვე არსებული სტატიების განვრცობასა და რედაქტირებას.
ქართული ვიკიპედიის განვითარებაში უდიდესი წვლილი შეაქვს „ვიკიმედიის მომხმარებელთა საქართველოს ჯგუფს“, რომელიც 2015 წელს შეიქმნა.
მას შემდეგ, ორგანიზაცია ქართული ვიკიპედიის განვითარების მიზნით, მრავალ სხვადასხვას სახის ღონისძიებას მართავს. მათ შორის არის სტატიების კონკურსები, მარათონები, ვიკიბანაკები, ვიკიპედიის ვორქშოფები დაინტერესებული საზოგადოებებისთვის, საქართველოს სხვადასხვა რეგიონში სკოლების ბაზაზე გაიხსნა ვიკიკლუბები, სადაც დაინტერესებული პირები სწავლობენ, როგორ შეიტანონ წვლილი ვიკიპედიაში და ვიკიმედიის სხვა პროექტებში.
2023 წლის 24 დეკემბერს, „ვიკიმედიის მომხმარებელთა საქართველოს ჯგუფმა“ ქართული ვიკიპედიის მე-20 დაბადების დღე აღნიშნა ტრადიციული საიუბიულეო ტორტითა და სასიამოვნო გარემოთი. იმავე დღეს ჩატარდა ტრადიციული, წლის შემაჯამებელი კონფერენციაც. ორგანიზაციის თანამშრომლებმა დამსწრე პირებს წარუდგინა მთელი წლის განმავლობაში გაწეული საქმიანობის ანგარიში და გააცნეს მომავალი წლის გეგმა.
ჩვენმა მრავალწლიანმა გამოცდილება აჩვენებს, რომ სტატიების კონკურსებს, ვორქშოპებს, ვიკიბანაკებსა და ვიკიკლუბებს სტრატეგიული მნიშვნელობა აქვს ქართული ვიკიპედიის განვითარებაში. ამ გზით, ჩვენ ყოველწლიურად უფრო და უფრო მეტ მოხალისეს ვიკრებთ ვიკიმედიის პროექტებში. ამავე დროს, „ვიკიმედიის მომხმარებელთა საქართველოს ჯგუფი“ განაგრძობს მუშაობას სხვა, ჩვენთვის ინოვაციურ პროექტებზე, რომელთა განხორციელებასაც უახლოეს წლებში შევეცდებით.
ქართულ ვიკიპედიას და მის რედაქტორებს კი ვუსურვებთ უფრო მეტ სტატიას და მოხალისეებს პროექტში და წარმატებულ განვითარებას.