.svg)
Los díes 12 y 13 del pasáu mes de setiembre l’auditoriu Príncipe Felipe d’Uviéu acoyó la celebración de los diez años de la Wikimedia en llingua asturiana. Foi esta vez un eventu especial, ya que dempués de dellos años la comunidá d’usuarios de la mesma alcuéntrase nun procesu de meyora y configuración d’oxetivos al envís de dar l’emburrión definitivu al proyectu.
Na xornada del vienres 12 empezó cola bienvenida de Xuacu Saturio, alministrador y embaxador técnicu en Wikipedia n’asturianu, quien fixo un pequeñu repás d’esa década. Siguió la charra Wikipedia: qué, quién, cómo no que foi un bon averamientu al so funcionamientu. Esta resultó d’utilidá a dellos de los presentes nel Taller d’edición que s’allargó’l restu de la tarde.
Al día siguiente, la xornada del sábadu cuntaba yá con dos premises; per una parte, los usuarios de la Wikipedia n’asturianu partíen de la convicción de que la lliteratura nesta llingua y los sos escritores son un elementu patrimonial a recoyer y documentar nesta enciclopedia, asina como de divulgar ente la sociedá (qué meyor qu’esfrutando de les sos pallabres). Y per otra parte, buscábase ofrecer una perspectiva más amplia sobre l’idioma, atendiendo más al dominiu llingüísticu en conxuntu. Ello ye que se recurrió a la figura del llionés Caitano Bardón (Carrizu, 1881) pa centrar un recital nel so homenaxe, autor de los famosos “Cuentos en dialecto leonés” y que foi pioneru na lliteratura n’asturllionés en Llión.
Esti dio empiezu col son de la xipla del músicu riberanu Fran Allegre, qu’al tiempu siguió amenizándolu con distintos instrumentos tradicionales llioneses. Alberto Flecha, estudiosu de Caitano y al igual qu’elli, natural de Carrizu, faló del escritor y realizó una pequeña síntesis del significáu de la so obra. Darréu, en collaboración cola asociación Faceira y el colectivu lliterariu Fame Poétika, lleéronse una serie de poemes tanto del propiu Caitano como d’otros autores n’asturianu.
El segundu actu del eventu, consistió nuna presentación cenciella del Wikiproyectu “Deporte n’Asturies” per parte de Denis Soria. Púnxose atención na necesidá d’estandarizar el rexistru llingüísticu de la propia Wikipedia, asina como la importancia de los wikiproyectos a la hora d’organizar la edición d’artículos. Arriendes d’ello, resumió los retos y los errores lóxicos nos primeros años y la necesidá d’abordar oxetivos comunes pa la comunidá d’usuarios cola intención d’uniformizar la imaxe de la enciclopedia, d’iguar estratexes d’interacción cola sociedá y facela medrar nel futuru próximu.
El papel de los medios, especialmente d’internet y del llabor de Wikipedia, a la hora de dinamizar y reforciar les actitúes d’usu de los falantes de cada territoriu del dominiu centró bona parte de la mesa redonda. Esta cuntó con unos invitaos mui especiales, como foron; David Melendi (profesor del Área d’Inxeniería Telemática de la Universidá d’Uviéu), José Ignacio Suárez (profesor de Musicoloxía na Universidá d’Uviéu y miembru de Faceira), Nicanor García (informáticu de l’Autoridá Portuaria del Musel, miembru tamién de Faceira), Pablo Rodríguez Guardado (redactor d’Asturies.com), Pelayu Valduvieco (estudiante de Filoloxía Románica na Universidá d’Uviéu y desenrollador de distintos proyectos de traducción), Xuacu Saturio (alministrador y embaxador técnicu en Wikipedia n’Asturianu) y Denis Soria (alministrador en Wikipedia y qu’actuó como moderador). Nella tratáronse dellos temes, como por exemplu los desafíos na codificación y normativización llingüística nos medios o de la política de recuperación nos distintos territorios con presencia de falantes. Foi un alderique mui provechosu y indiscutiblemente los tertulianos dexaron el nivel mui altu, captando dafechu l’atención del públicu a lo llargo de tola hora que duró. Rematada la tertulia repartiéronse una serie de libros ente los asistentes donaos poles editoriales Asturtoons, Ediciones Trabe, Hércules Ediciones, Librería Cervantes y Ediciones Nobel.
Ensin otro, púnxose puntu y final al eventu con una xinta de confraternización ente tolos participantes por cortesía del conceyu, quien amás cedió l’espaciu nel Auditoriu. Nella la comunidá de la Wikipedia n’asturianu agradeció’l llabor de difusión y organización realizáu polos miembros de Wikimedia España, de quien partiera la iniciativa y ensin los que sedría imposible la celebración del aniversariu. De la mesma manera, treslladaron el compromisu de programar futures actividaes dientro y fuera del décimu aniversariu.
Rubén Ojeda, miembro de Wikimedia España
