Poingkuro o “WikiOrkestra” nakaanu do poposolimbou muzik Poland id Wikimania 2024

Nunu iti WikiOrkestra?

Ontok Wikimania 2024 di Katowice, nakaanu “WikiOrkestra” do manahak koposolimbahan id sinasawat di koinsan nogi. Idea do projek nopo diti nga pinoilo ontok do wulan Mahas maya do kapamalahawan kumaa mamaamain muzik ii aanangan mantad do gura Wikimedia. Prototaip montok orkestra diti nopo nga WikiEulenOrchester, ii minanahak koposolimbahan ontok do persidangan tounan komuniti Wikimedia boros Jerman, WikiCon. Lukas Mezger, songulun puru WikiEulenOrchester, ii manu do miampayat sabaagi tinimungan muzik montok Wikimania baino id goos manahak pamagatangan kumaa bandar tuan walai, Katowice ii pungaranan sabaagi Bandar Muzik UNESCO.

Siam nohopod puru komuniti mantad pogun di mogisuusuai mantad do sompomogunan, minanahak do tisuli kokomoi pamalahawan do mampayat id WikiOrkestra diti. Duo biola tagayo, iso biola (yoho – monuunuat), iso selo, iso dabal bes om duo bes lotirik, duo sorunai, iso klarinet, iso mamaamain piano, iso gitar, iso ukulele, iso akordion, iso mamaamain genderang, om limo lulumoyou. Program nopo diti nga kiwaa do duo sinding: koiso, iso sinding piano di nointutunan mantad di Chopin, songulun ponggubah sinding di nointutunan id Poland, ii noulud montok tinimungan muzik instrumental om sumusuhut nopo nga sinding koulunan do Silesia. Potitikid tulun nga nokotorimo helaian muzik diolo sondii pogulu po, montok minluda id walai. Sinding piano di Chopin nopo nga Nocturne op. 9 no. 2, ii nointutunan no kanto do tulun mantad do skor filom. Iso nopo kagu nga sinding koulunan Silesia ii lohowon do “Karliku,” kokomoi songulun tondu ii minsingilo kokomoi iso episod koposion Karliku, songulun do pelombong. Gama tu sinding diti nopo nga linoyou id boros Poland, pinoilang o iso rakaman do pogulu ii montok monguhup do lulumoyou ngaawi do tumounda montok koposolimbahan id walai. Ontok do minggu-minggu kumaa do Wikimania, puru orkestra nopo nga minongulud kopotoundaan diolo id iso pogibaabarasan tinimungan. Tinimungan ii manarampas nga nakaanu do mongulud siwa kakamot montok di tutumombului do sompomogunan. Natantu mantad dahai do momoguno basaan i toinsanan do oitom, om nokosorou oku dii, do mogowit basaan oitom.

Raptai koiso – om iri-iri noh – dahai

Kopongo abaabayan kopongukaban do minsosodop tadau koiso persidangan, minogitiitimung o puru WikiOrchestra ontok do makan totuong. Piipiro nopo diolo nga miagal di kopogintutun-tutun no do tiso om tiso, nga au oku po yoho insan do nokoruba isai-isai pogulu diti. Ontok tadau koduo, minogongoi oku do biola ii siniwaan ku om minamain do toruhai id hotel. Kakamot dii nopo nga wagu po, nga tuni dau nopo nga osonong kopio om atalang gisom do au haro kobolingkangan ku do minamain.

Minsosodop do tadau kotolu, pinapaharo yahai do raptai koiso dahai id sinasawat gulu ii gunoon montok do koposolimbahan dahai. Ontok di timpuunon ii, osokodung yahai miampai do tempo o mamarati sondii boogian do instrumental sinding “Karliku” nopo nga opongo po do kotimpuun koloyou i koir tokoro. Nga, gama tu aiso momuruan do orkestra dahai, mamaamain genderang no ii kitonggungan do mongintob do kotimpuunan. Ii lulumoyou nopo ngaawi nga nokopinluda no do lirik id boros Poland tu osonong kopio o aasil dau sundung do ii momogun i korongou dahai nga koboros. Kopongo do raptai montok Chopin, ii binuruan di Kathrin Krichel, songulun Wikimediawan om puru muzik profesional. Montok goduuduo sinding dii, kedua-dua lagu, minanahak o ponuhuan ii Lukas kumaa dahai kokomoi poingkuro mamain do muzik dii, om toinsanan ii mamaain do muzik nga manahak do sokodung di osonong.

Abaabayan gulu

Ontok tadau kaapat om tadau tohuri do persidangan, nokoimpuun o abaabayan panantaban miampai do booboroson gulu do mamaamain gitar, Gereon Kalkuhl. Booboroson dii nopo nga berwawasan kokomoi Wikipedia om muzik. Tumilombus, pinointutun di Lukas iti WikiOrkestra, puru-puru om om muzik Chopin. Kaagu, toinsanan puru orkestra nopo nga poinrasuk rasuk tongoitom, suminuang kumaa id sinasawat miampai no do momuruan muzik dahai ii minampayat montok kotimpunan do koposolimbahan. Minimpuun iti miampai do piano maya solo no, om tinilombus miampai do kakamot di mogisuusuai i minonuang do diwan miampai melodi ii olumis. Guminuli o puru orkestra kumaa id tirikohon miampai tapap longon di opuhod mantad di mogiigintong om noputan miampai do ababayan panantaban miampai kapanahakan gaa montok poster persidangan di tosonong kopio. Oruhai nodi olimpupusan o abaabayan om nokotonduli kawagu o WikiOrkestra kumaa id sinasawat miampai ponogulu do kointalangan mantad di Lukas kokomoi sinding kumoduo ii “Karliku”, sinuhut do mamaamain dram i minanahak do isyarat do sumuang do loyou. Rolou tongoondu om tongokusai nopo nga mogisoosowoli montok apat do rangkap, miampai rinuhangan do kakamot pomoruhang, kohompit no ii akordion om ukulele. Montok rentak di tohuri no, toinsanan yahai nga pinopolombus do “hei!” om minangakat do longon.

Puru orkestra, ii nokorikot mantad pogun di mogisuusuai do sompomogunan miampai no do koinganan om latar likud muzik ii mogisuusuai gisom nakaanu pinoposiliu do koposolimbahan sundung do piipiro no jaam do minluda. Id topurimanan ku, iti nopo nga okon ko gama do kuasa muzik no nga, gama nogi do gatang ii pinogiilangan mantad do Gura Wikimedia, ii miimpohon do pisokodungan. Ontok tadau di potilombus nopo dii, pinaatod o gambal koposolimbahan kumaa do Wikimedia Commons, om pinosuang nogi id Wikidata montok tinimungan muzik i noworun diti. Miampai do woyo diti, nakaanu WikiOrktestra do mogiilang tema Wikimania 2024, “Pisokodungan Poingukab”