Kalab Wiki Kent: Pomolingkuman Sontoun

by , Popoingkawas koubasanan om boros Kadazandusun kumaa platform sompomogunan.and
Translate this post

Soira do nokointutun kumaa komuniti Kadazandusun solinaid do siam wulan id Institut Pendidikan Guru Malaysia (IPGM) Kampus Kent, nokoimagon o Kalab Wiki Kent (Kent Wiki Club) ontok18 Magus 2023. Agayo o rati diti soira do nokoimagon aantakan do Wikimania 2023 id Singapura. 

Gambar tinimungan miampai Wikimediawan Malaysia ontok Wikimania Singapura 2023. Jjurieee, CC BY-SA 4.0, mantad Wikimedia Commons

Notoodo o Kalab Wiki Kent maya asil pirotian om pisokodungan mantad do lungkitas id IPGM Kampus Kent poimbida mantad Jabatan Boros Kadazandusun (JBKD) miampai no do momoomogura Tinimungan Komuniti Momoomoguno Wikimedia Malaysia (Wikimedia CUG Malaysia). 

Solinaid do sontoun diti, ogumu abaabayan i pinoindalan do Kalab Wiki Kent. Pointarad iti kumaa do koinlaaban koubasanan om boros Kadazandusun, suai ko poposinggawa toilaan maya do projek-projek Wikimedia.

Abaabayan gulu

Kiwaa tolu abaabayan gulu ii nosiliu do tarad Kalab Wiki Kent do toun diti montok sesi 2023/2024, ii nopo nga: Wiki id Sikul, WikiKaamatan om WikiTour. 

Wiki id Sikul

Gambar tinimungan tangaanak om mongingia do Sikul Kabansaan Kindu. Evaaudreyanne, CC BY 4.0, mantad Wikimedia Commons

Wiki id Sikul, toi ko’ “Wiki at School” nopo nga siri abaabayan ii pinoindalan id sikul-sikul di nopili montok popointutun do Wikimedia kumaa tangaanak om koulunan id posorili. Suai ko iri,abaabayan diti nga noguno montok mondokumentasi koubasanan momogun kumaa do platform Wikimedia. Solinaid timpu do sontoun diti, duo sikul om kampung ii notombului, ii nopo nga Sikul Kabansaan Bundu Tuhan, Ranau om Sikul Kabansaan Kindu, Tuaran, ii goduuduo nga poingiliu id Sabah, Malaysia.

Iso ponuatan Diff i nowonsoi miampai do uhu id Inggeris nopo nga “The Kent Wiki Club Promotes Participation of Primary School Students in Wikimedia Projects”. Kiwaa nogi o versi Malayu montok ponuatan diti.

WikiKaamatan

Blusjai, CC BY-SA 4.0, mantad Wikimedia Commons

WikiKaamatan nopo nga pongoputan mantad do “WikiBudaya” (Inggeris: Wiki Culture) ii pinaanjul ontok toun 2023. Montok toun diti, noonuan do kasagaan o Kalab Wiki Kent mantad do panganjul Kapanaandakan Tadau Kaamatan montok mongukab do “booth” montok tombuluyon do tongoulun id tiyonon do abaabayan id Diwan Hongkod Koisaan Kadazandusun (KDCA) Penampang, Sabah. Ontok do WikiKaamatan diti, nakalantoi o Kalab Wiki Kent miampai nakaanu mondokumentasi gambal di ogumu ontok do kapanaandakan Tadau Kaamatan, ii taandakon do tongoulun Kadazandusun.

Kiwaa duo ponuatan Diff i nowonsoi; miampai do uhu id Kadazandusun “WikiKaamatan: 1500+ Gambal Kaamatan i pinaatod do Kalab Wiki Kent kumaa id Wikimedia Commons”, kiwaa id Malayu om Inggeris nogi om iso po kawagu id Inggeris nopo nga “Celebrating Harvest Festival: An In-Depth Exploration of Kadazandusun Culture through WikiKaamatan 2024”

WikiTour

WikiTour nopo dii nga siri abaabayan mimpanau kumaa do longkod pondidikan montok popoindalan do bengkel Wikikamus montok boros etnik id Malaysia, suai ko montok popointutun projek Wikimedia suai miagal ko Wikipedia om Wikimedia Commons. Iti nopo nga abaabayan ii nakaanu do kousinan tosikap mantad kousinan Komuniti Wikimedia. Maya abaabayan diti, nakaanu yahai do popointutun Wikikamus kumaa 3 tinimungan di ontokon dahai, ii nopo nga: Mongingia ngaawi mantad Jabatan Pendidikan Negeri Sarawak (montok boros Iban), Mokiikinobos ngaawi montok program boros Kadazandusun id Fakulti Boros om Komunikasi, Universiti Pendidikan Sultan Idris (montok boros Kadazandusun), om tangaanak Sikul Takawas Kabansaan Sandakan (montok boros etnik diolo sondii). Id kosiwatan diti, monongkotoluod yahai kumaa do komitikuasa ii pinapasaga do kopokionuan kousinan diti.

  • Wikitour Sibu. Abbylaylena Sitibon, CC BY 4.0 , mantad Wikimedia Commons
  • WikiTour Perak. Nelynnnnn, CC0, mantad Wikimedia Commons
  • WikiTour Sandakan. Anzellyssa, CC0, mantad Wikimedia Commons

Kaampayatan id persidangan sompomogunan

Montok sontoun diti nogi, opurokis o Kalab Wiki Kent do papaatod mobi do mampayat id abaabayan i poindalanon do Wikimedia. Maya do okon potilombus, nakapanahak iti do kosiwatan kumaa do Kalab diti montok do popointutun diolo kumaa komuniti Wikimedia do suai.

Koiso, Persidangan Wikimedia Hab Asia Timur, Asia Tenggara om Pasifik (ESEAP) 2024 ii pinoindalan id Kota Kinabalu, Sabah, Malaysia. Soginumu 16 tulun puru Kalab ii minampayat do persidangan diti, sabaagi komitikuasa popoindalan, mampayat om papabanta. Abaabayan 3 tadau 2 sodop diti nopo nga nakapanahak do kopokitanan om kosiwatan kumaa puru gisom nokohimpot do pinapalantoi diti persidangan om nogi mogiruuruba miampai do Wikimediawan mantad rantau ESEAP.

Jjurieee, CC BY-SA 4.0, mantad Wikimedia Commons

Kumoduo, Wikimania 2024 ii pinoindalan id Katowice, Poland. Soginumu 3 tulun puru Kalab ii nokosiwat do mampayat id persidangan do toun diti. Iti nopo nga Wikimania koduo montok tootolu diolo kopongo do Wikimania Singapura 2023. Tema tiknologi i pinatantu do Wikimania toun diti nopo nga relevan om nakaanu do manahak tua’ pomusarahan kumaa diolo montok poilangan om poindalanon kumaa tinimungan di ontokon do Kalab Wiki Kent id timpu dumontol. Ii nopo nakagayat do ginawo dahai nga poingkuro o sosongulun Wikimediawan kaanu do popiamung do koubasanan Wikimedia id suang korohian dau do potiitikid tadau om poingkuro o pondidik ngaawi kaanu momoguno do platform Wikimedia sabaagi kakamot id suang sesi pongiaan om pinsingilaan id sikul toi ko’ sabaagi sukuon id ponoriukan.

Gambar tinimungan miampai Wikimediawan Malaysia ontok Wikimania Katowice 2024. Youngjin Ko, CC BY 4.0, mantad Wikimedia Commons

Buruanon kawaawagu

Ontok do 19 Madas 2024, pinoindalan o mesyuarat agung tounan do Kalab Wiki Kent di koinsan nogi. Id mesyuarat do baino, piipiro ahal kokomoi do buruanon om panarampasan organisasi nopo nga nootus miagal ko:

  • Koundolihon buruanon sesi wagu, miampai do nourias o Komitikuasa kalab sesi 2023/2024 om tinoodo o Komitikuasa kawaawagu montok sesi 2024/2025.
  • Nosiliu i Bluster Jainon sabaagi do ponorikohon wagu miampai sokodung do majoriti.
  • Motto kalab mantad do “Okon nopo ko yati, isai po?” nopo nga nalanan kumaa motto kawaawagu ii nopo nga: “Boros nopo nga guas toilaan“.
  • Misi wagu montok do sesi diti nopo nga “Popoubas kopomogunaan Boros Kadazandusun maya online,” miampai do visi do “Papanggor kopomogunaan Boros Kadazandusun id kopoilangan toilaan maya online.”
  • Bluster Jainon manahak booboroson ontok do mesyuarat agung tounan. Jjurieee, CC BY-SA 4.0, mantad Wikimedia Commons
  • Jjurieee, CC BY-SA 4.0 , dari Wikimedia Commons

Logo wagu

Ontok 18 Magus 2024, nogonop no sontoun o Kalab Wiki Kent miampai kapanaandakan do 365 tadau notoodo o kalab diti. Nataandak iti miampai do pomutulan kiik.

Ontok do panaandakan dii, pinointutun nogi logo wagu montok Kalab Wiki Kent, ii naasil do Tinimungan Komuniti Momoomoguno Wikimedia Malaysia.

Wikimedia Malaysia, CC BY 4.0 mantad Wikimedia Commons

Angkab om lansanon

Tumilombus do mamanau, nuru do potilombuson o poranan Kalab Wiki Kent montok popoingkawas om popoinlaab po kawagu do koubasanan om boros Kadazandusun, suai ko popointutun do projek-projek Wikimedia kumaa komuniti momogun. Komitmen om tupus kumaa sandad tokou nuru do igitan om poguluonon id goos do poposinggawa toilaan kokomoi koubasanan om boros Kadazandusun diti maya platform Wikimedia.

Alansan do kalantoi, Kalab Wiki Kent!

Can you help us translate this article?

In order for this article to reach as many people as possible we would like your help. Can you translate this article to get the message out?