Minampayat o Kalab Wikimedia IPGM Kampus Kent doid Abaabayan Pitabangan Waterford di pinaanjul do Wikimedia Community User Group Malaysia. Abaabayan di nokoindalan solinaid 9 tadau mantad 21 gisom 29 Manom 2024 diti kitudu do popogumu po kawagu suang do Wikipedia kokomoi do Waterford sabaagi momiwalai do Celtic Knot Conference 2024. Ponokotulu di nopili do toun diti, ii no ‘Pitabangan Waterford’, pinoposomok po kawagu ginawo do moningkanai mantad Kalab Wikimedia Kent kumaa abaabayan diti. ‘Pitabangan’ nopo nga iso boros mantad Boros Kadazandusun di kirati do ‘pogiuhupan’ om ‘pogisosompuruan’. Kopomilian do boros diti okon ko nopo sabaagi iso bontuk kapamagatangan kumaa dtp Wikipedia di wagu nogi nakaharo nga popokito nogi do sunduan pogiisaan do sontob moningkanai mantad mogisuusuai pogun id abaabayan diti.
Poingkuro Kopoindalanan do Abaabayan diti?
Pinoindalan o kohimaganan do abaabayan diti doid Kalab Wiki Kent aantakan 21 Manom 2024 jaam 8 totuong. Mantad do tadau dii, ginumoos o puruan Kalab Wiki Kent do papadalin mogisuusuai atikol kokomoi Waterford kumaa boros tina. Poomitanan nopo nga kokomoi do koubasanan diolo, pulitik, pondidikan om nogi sajara do kinoyonon diti. Pambasaan om kopomodolinan diri okito do kaanu papapalaab do komilaan puruan Kalab Wiki Kent kokomoi nubasanan do pogun suai di mositi maan gatango.
Kounalan do abaabayan
Kaampayatan id abaabayan do irad iti okon ko nopo manahak do komilaan wagu kumaa puruan di ginumoos, nga kaanu nogi do pogirot sunduan mogiuhup-uhup id pialatan do puru Kalab Wikimedia Kent om nogi moningkanai mantad labus pogun. Nunu i kagayat ginawo nopo nga abaabayan diti minomohinta do pogiuhupan kaanu papaasil do ahal tagayo. Sundung do hiti id Sabah, nga nakaanu kasari tulun tokou do popinggumu komilaan songwinoun miampai monuat kokomoi Waterford id boros tina. Pokito iti nogi do boros Kadazandusun kaanu masi’ om koburu id platform sompomogunan miagal Wikipedia.
Laang sumusuhut do KWK?
Miampai sunduan pitabangan di pinokito id abaabayan diti, amu tumingkod o Kalab Wiki Kent do hiti! Kalapas do abaabayan diti, kisunduan tinimungan diti do popoindalan do pogumbalan doid abaabayan – 40 Tadau Wikipedia:366 Atikol id Boros Kadazandusun. Pogumbalan solinaid do 40 tadau dilo atantu do lobi kohiok om toinsanan nga alapon do dumopitor. Id kootusan, kanou miampai dahai popogumu komilaan montok toinsanan, popimagon boros minoriti om mamasi boros id winoun do digital.
Iloo lobi gumu kokomoi ababayan diti:
“Boros nopo nga guas toilaan-Motto Kalab Wikimedia Kent 2024”
Can you help us translate this article?
In order for this article to reach as many people as possible we would like your help. Can you translate this article to get the message out?
Start translation