Konfèrensi Wikisource 2025 ditetepaké dadi acara adi taun iki kanggo para naralila Wikisource ing saindenging jagad amarga ngajak kanca-kanca sing adrèng ngrembakaké Wikisource, para naralila, lan mitra saka saindenging jagad bebarengan menyang Indonesia. Karancang bakal dianakaké tanggal 14-16 Februari 2025 ing Bali, Indonesia, kanthi tema “Wikisource: Ndadekaké Wangun & Nglestarekaké Warisan sacara Digital “. Konfèrensi iki njanjèni bakal dadi wadah kanggo para naralila Wikisource supaya bisa sesambungan, nggarap proyèk kanthi gotong-royong, lan ngrembug maneka werna reribed sing gegayutan sajroning paguyuban. Konfèrensi iki nduwèni tujuan nyedhiyakaké wadah sing bisa digunakaké para nalalila Wikimedia ngumpul, ijol-ijolan gagasan, mbagèkaké crita, lan bebarengan ngrampungaké tantangan sing diadhepi proyèk Wikisource. Sajroning konfèrensi ana cukup wektu sing kasedhiyan kanggo para panyarta nyepakaké dhiri lan melu nyengkuyung.
Kanggoné kanca-kanca sing adrèng babagan proyèk lan memitran Wikisource lokal utawa multibasa, sawernaning katrangan bebas hak cipta utawa nggawé sawernaning katrangan iku supaya luwih gampang dirambah, konfèrensi iki mbukak kesempatan sing beda timbang liya-liyané amrih bisa nggawé paguyuban iki sansaya nyawiji lan bakoh. Mliginé, patemon iki mratandhani Konfèrensi Wikisource kapisan ing sajroning sepuluh taun kanthi nganakaké acara wiwitan ing wulan November 2015 ing Wina, Austria. Wiwit kuwi, ana pepenginan sing tuwuh supaya bisa nglumpuk manèh lan nguri-uri paguyuban Wikisource sacara global. Konfèrensi kaping pindho, sing sadurungé diusulaké bakal dianakaké tahun 2020 ing Warsaw, Polandia, emané kudu ditangguhaké amarga ana pageblug COVID-19. Nanging, sanajan ana maneka warna tantangan, rembugan bab iki tetep mlaku terus. Ing taun 2023, kanca-kanca ngupayakaké supaya konfèrensi bisa kaleksanan manèh. Pungkasan, ing taun 2024, Yayasan Wikimedia nyetujoni patemon sing wis suwé ditunggu-tunggu, mratandhani kegiyatan penting kanggo para naralila Wikisource sing adrèng ing saindenging jagad. Konfèrensi iki disengkuyung dening kelompok naralila paguyuban Wikisource, Wikimedia Indonesia, lan Wikimedia Denpasar.
Blangko beyasiswa saiki wis KASEDHIYAN:
Blangko beyasiswa saiki kasedhiya kanggo para naralila Wikisource sing jumbuh karo sarat-sarat teka ing konfèrensi iki. Kaya adaté, cacahing panyarta acara iki diwatesi, lan tim Beyasiswa sing bakal milih. Pranala blangko beyasiswa ana ing kene. Pendhaptaran beyasiswa wis dibukak lan bakal ditutup tanggal 29 September 2024.
Sembarang pitakonan sing sesambungan karo konfèrensi bisa ditakokaké marang panitiya ing kaca rembugan konfèrensi ing meta utawa liwat layang elektronik wikisourceconference@gmail.com
Can you help us translate this article?
In order for this article to reach as many people as possible we would like your help. Can you translate this article to get the message out?
Start translation